El 26 d’avientu pasáu, el Conseyu de Ministros aprobó les fiches pa regular los estudios de delles inxenieríes, cola mirada puesta na adaptación a los planes europeos, y dexó fuera a Informática, un determín que pa los profesionales d’esti sector va llevar al Estáu español a un retrasu tecnolóxicu de cincuenta años. La cántabra Cristina Pelayo García-Bustelo faló con LES NOTICIES sobre les consecuencies d’esta decisión.

PABLO R. GUARDADO
¿Cómo queda la situación depués de que’l Conseyu de Ministros dexara ensin regular la titulación d’Inxeniería Informática?
-Esta decisión déxanos como la única inxeniería, xunto a Inxeniería Química, que nun tien una ficha definida pol Gobiernu. Les fiches impliquen que les demás inxenieríes de toles universidaes, a la hora de sacar les titulaciones nueves, los graos y los postgraos, van tener que siguir una troncalidá establecida pol Gobiernu, mentes qu’Informática, non.

¿Qué consecuencia va tener la falta d’esa ficha?
-Al nun tener una troncalidá común, cada universidá va poder sacar la titulacion, si ye que la saca, coles asignatures y les competencies educatives que quier conseguir de la manera qu’ellos decidan. Eso implica una desaparición de facto de la Informática como titulación tal como la conocemos. Cada universidad tendrá les asignatures que más-y convengan y va dilise lo que ye la profesión de la informática, porque nel momentu en que nun tienes una titulación que dicte unos requisitos mínimos p’acceder a la profesión, degrádase too.

¿Nun valieron de nada les movilizaciones de los inxenieros informáticos d’estos meses últimos?
-Hubo dellos avances na negociación col Ministeriu de Ciencia y Innovación gracies a les movilizaciones de payares, y el día 9 de xineru tengo prevista una xunta con responsables d’esi ministeriu pa ver si de dalguna manera se pueden definir les fiches d’Infomática. El problema ye que yá nun vamos ser igual que les demás inxenieríes, que yá lo sacaren el día 26 d’avientu. Yá nun salimos nel mesmu puntu.

Amás, hai un problema de base, que ye’l tresfondu d’esta situación: el Gobiernu nun saca les fiches d’Inxeniería Informática nin de Química porque nun son una profesión regulada; les úniques inxenieríes nel Estáu. Na llei nueva d’Educación establecíase que’l Gobiernu namás diba crear fiches pa les profesiones regulaes. Como nun tamos regulaos, nun nos saquen fiches. Pero, ¿por qué nun tamos regulaos? Porque’l Gobiernu d’España nun cumplió cola llei nel so tiempu. Ye un círculu viciosu.

¿Nun hai manera d’atopar una solución a esta situación?
-Yo toi diendo a xuntes nos tres ministerios de referencia: Ciencia y Innovación; Industria, Turismu y Comerciu; y Economía y Facienda. N’Innovación dícenme que, al nun tar regulaos, nun nos pueden sacar ficha. N’Industria argumenten que, como nun tenemos ficha, nun nos pueden regular. P’acabar, n’Economía y Facienda salten con que nun quieren la regulación de nenguna profesión. Nesti últimu casu, respetamos la decisión del ministeriu, pero si les demás inxenieríes tán regulaes, nosotros tamién tenemos que tar regulaos. Nun queremos competencies específiques, namás lo mesmo que les demás y, precisamente, pa protexenos de les demás, porque lo qu’asocedió agora ye que nes fiches de la Inxeniería en Telecomunicaciones salen competencies de la nuestra inxeniería.

Más en: Cristina Pelayo García-Bustelo: «En cinco años nun va haber xente capacitao pa trabayar n’informática»

Actualizado: Comunicado conjunto del CCII-CONCITI tras la reunión con el Ministerio de Ciencia e Innovación

Relacionado con:

• Desconvócase a concentración das Enxeñarías en Informática en Ourense
• Zapatero no trajo el calendario de obras a Asturias